SNEAK PEEK
Our next exhibition.......
EVENTS
Painting with words
Painting with words: 24 May 2012 @ 18:30 for 19:00
Valiant Swart - Toorwoorde
24 Augustus 19h30
Die immergewilde Valiant Swart kom lê op Woensdag 24 Augustus besoek af in Durbanville vir 'n optrede by Rust-en-Vrede.
Anders as met sy gebruiklike solo-vertonings, waar hy die gehoor trakteer met sy kitaar en sy liedjies en staaltjies oor die langpad, val die klem hierdie slag op die bekendstelling van sy nuwe liriekbundel, 'Toorwoorde roep my'. Valiant se 'boekpraatjies' het intussen ook 'n gewilde deel van sy konsert-repertoire geword. Met 'n gesprekleier wat die aanvoorwerk doen, word daar in die eerste helfte van die program vertel oor die skryf- en komponeerproses, toegelig met voorlesings en die bespreking van 'n paar uitgesonderde lirieke.
Tydens die tweede helfte is dit weer Valiant soos gehore hom lank reeds ken – die blues-kitaar, die bekfluitjie en stories en liedjies wat vloei, soms hartroerend en peinsend, soms eenvoudig skreeusnaaks.
Hierdie is 'n geleentheid wat jy nie moet misloop nie. Bespreek sommer nou jou plek by Monica 021-9764691. Die vertoning begin om 19:30. Kaartjies kos R130 en sluit heerlike sop en vars brood in. Eksemplare van 'Toorwoorde roep my' sal na die tyd te koop aangebied word.
Chris Chameleon
6 September
Ons hou ‘n een-aand-uitstalling van werke wat op Ingrid Jonker se digkuns gegrond is. Die tentoonstelling sal op 6 September 2011 by die Rust-en-Vrede Galery in Durbanville plaasvind en Chris Chameleon sal van sy musikale verwerkings van Jonker se werk uitvoer.
Chris Chameleon het in 2005 bekendheid verwerf vir sy toonsettings van Ingrid Jonker se werk Ek herhaal jou. Hy het sopas ‘n tweede cd, As ek weer skryf, uitgereik waarop hy verdere verwerkings van Jonker se werke gedoen het. Ingrid Jonker se skryfwerk is baie ritmies, maar ook ryk aan simbole en daarom baie geskik om as inspirasie vir die visuele kuns te dien.
Ons het ‘n groep uitgesoekte kunstenaars genader om werke te skep wat saam met haar gedigte uitgestal sal word: Pierre Fouche, wenner van Absa Atelier kompetisie, Theo Kleynhans, KKNK en Woordfees kurator en kunstenaar, Sandra Hanekom, bekende kunstenaar en kurator, Vernon Swart, kunstenaar en musikant, Lynette Bester, dosent en kunstenaar, Corlie de Kock, Paula van Coller, Theo Paul Voster, Christo Basson, Cobus van Bosch, skrywer en kunstenaar en Lenie Harley, bekende beeldhouer.
Hierdie tentoonstelling is baie eksklusief, intiem en uniek. Ons poog om die verskillende kunste saam te smee in een buitengewone gebeurtenis.
Kaartjies teen R130 per persoon is beskikbaar by Rust-en-Vrede Galery. Kontak Monica Ross by 021-9764691 of per e-pos by rustenvrede@telkomsa.net
